अण्णासाहेब कोळेकर यांना ‘उत्कृष्ट पोलीस पाटील’ पुरस्कार; जिल्हाधिकारी कीर्ती किरण पुजार यांच्या हस्ते गौरव

काक्रंबा वाडीच्या पोलीस पाटलाचा जिल्हास्तरीय सन्मान!

अण्णासाहेब कोळेकर यांना ‘उत्कृष्ट पोलीस पाटील’ पुरस्कार; जिल्हाधिकारी कीर्ती किरण पुजार यांच्या हस्ते गौरव

तुळजापूर : ज्ञानेश्वर गवळी

तुळजापूर तालुक्यातील काक्रंबा वाडी येथील गावातील कायदा व सुव्यवस्था, प्रशासनाशी समन्वय आणि सामाजिक सलोखा राखण्यासाठी केलेल्या उल्लेखनीय कार्याची दखल घेत तुळजापूर तालुक्यातील काक्रंबा वाडीचे पोलीस पाटील अण्णासाहेब कोळेकर यांना जिल्हास्तरीय ‘उत्कृष्ट पोलीस पाटील पुरस्कार’ प्रदान करण्यात आला. परंडा येथे झालेल्या महसूल विभागाच्या विशेष कार्यक्रमात सन्माननीय जिल्हाधिकारी कीर्ती किरण पुजार यांच्या हस्ते त्यांचा गौरव करण्यात आला.

गावातील कायदा व सुव्यवस्था अबाधित ठेवण्याबरोबरच महसूल विभागाच्या विविध योजना व प्रशासकीय कामांची प्रभावी अंमलबजावणी करण्यासाठी कोळेकर यांनी केलेल्या कार्याची प्रशासनाने दखल घेतली. तसेच गावातील नागरिकांमध्ये सलोखा, शांतता आणि सामाजिक एकोपा टिकविण्यासाठी त्यांनी बजावलेल्या भूमिकेमुळे त्यांची जिल्हास्तरीय पुरस्कारासाठी निवड करण्यात आली.

पुरस्कार स्वीकारल्यानंतर अण्णासाहेब कोळेकर यांनी या सन्मानाचे श्रेय काक्रंबा वाडीतील ग्रामस्थ, कुटुंबीय आणि सहकाऱ्यांना दिले. “हा पुरस्कार माझ्या एकट्याचा सन्मान नसून ग्रामस्थांनी दाखविलेल्या विश्वासाचे फलित आहे. या सन्मानामुळे प्रशासकीय आणि सामाजिक कार्याची जबाबदारी आणखी वाढली आहे,” अशी भावना त्यांनी व्यक्त केली.

◾ग्रामस्थांकडून अभिनंदनाचा वर्षाव

जिल्हास्तरीय उत्कृष्ट पोलीस पाटील पुरस्कार मिळाल्याबद्दल काक्रंबा वाडीतील ग्रामस्थ, महसूल विभागातील अधिकारी-कर्मचारी, पोलीस पाटील संघटना आणि मित्रपरिवाराकडून तसेच तुळजापूर तालुका पत्रकार संघाकडून अण्णासाहेब कोळेकर यांचे अभिनंदन करण्यात येत आहे.

गावपातळीवरील जबाबदारीला जिल्हास्तरीय पुरस्काराची पोचपावती मिळाल्याने काक्रंबा वाडीच्या शिरपेचात मानाचा तुरा खोवला गेला आहे.

0 8 5 6 2 6