जनतेचा सेवक… आता सुनील घाडगे रिंगणात! वेताळ नगरच्या नागरिकांच्या आग्रहाला प्रतिसाद; प्रभाग क्र. ८ मध्ये उमेदवारी अर्ज दाखल
जनतेचा सेवक… आता सुनील घाडगे रिंगणात! वेताळ नगरच्या नागरिकांच्या आग्रहाला प्रतिसाद; प्रभाग क्र. ८ मध्ये उमेदवारी अर्ज दाखल
जनतेचा सेवक… आता सुनील घाडगे रिंगणात!
वेताळ नगरच्या नागरिकांच्या आग्रहाला प्रतिसाद; प्रभाग क्र. ८ मध्ये उमेदवारी अर्ज दाखल
तुळजापूर : ज्ञानेश्वर गवळी
तुळजापूर नगरपरिषद सार्वत्रिक निवडणूक २०२५ जसजशी जवळ येत आहे, तसतशी शहरातील विविध भागांमध्ये राजकीय हालचालींना वेग आला आहे. विशेषत: वेताळ नगर परिसरात नव्या समीकरणांची चाहूल लागली असून, स्थानिक नागरिकांच्या सातत्यपूर्ण आग्रहानंतर समाजाभिमुख कार्यासाठी ओळख असलेले सुनील घाडगे यांनी अखेर निवडणूक रिंगणात उतरण्याचा निर्णय घेतला आहे.
आज दिनांक १५ नोव्हेंबर रोजी प्रभाग क्र. ८ मधून त्यांनी अधिकृतपणे उमेदवारी अर्ज दाखल करून आपली राजकीय पावले पुढे टाकली. यावेळी त्यांच्या समर्थकांची मोठी गर्दी उपस्थित होती. लोकांच्या अपेक्षा, विश्वास आणि आशिर्वाद घेऊन निवडणुकीत उतरण्याचा निश्चय घाडगे यांनी यावेळी व्यक्त केला.
वेताळ नगरात गेल्या काही वर्षांपासून सुनील घाडगे सामाजिक कार्य, पाणीपुरवठा, स्वच्छता, रस्ते दुरुस्ती तसेच नागरिकांच्या दैनंदिन समस्यांवर सक्रियपणे काम करत असल्याने त्यांच्याबद्दल लोकाभिमुख प्रतिमा तयार झाली आहे. अनेक वेळा प्रशासनाकडे पाठपुरावा करून स्थानिक प्रश्न सोडविण्यात त्यांनी पुढाकार घेतल्याचे नागरिक खुलेपणाने सांगत आहेत.
निवडणूक जाहीर होताच वेताळ नगर परिसरात “या वेळेस आपला प्रतिनिधी आपणच निवडू” अशी भावना निर्माण झाली. नागरिकांच्या बैठका, चर्चासत्रे आणि स्थानिक तरुणांच्या समर्थनामुळे घाडगे यांचे नाव पुढे आले. अखेर या सर्वांच्या इच्छेला मान देत त्यांनी उमेदवारीची घोषणा केली.
अर्ज दाखल केल्यानंतर बोलताना घाडगे म्हणाले, “मी राजकारणात सत्तेसाठी नाही, तर प्रत्येक सामान्य नागरिकाचा प्रश्न प्रामाणिकपणे सोडवण्यासाठी आलो आहे. वेताळ नगरचा विकास, स्वच्छ परिसर, पाणीपुरवठ्याचे प्रश्न, रस्ते-विजेची कामे आणि युवकांसाठी उपक्रम—हे माझे प्राधान्य असेल. जनतेचा विश्वास हीच माझी ताकद आहे.”
दरम्यान, प्रभाग क्र. ८ मध्ये घाडगे यांच्या प्रवेशाने निवडणुकीला नवीन उष्मा मिळाला असून, इतर उमेदवारांच्या समीकरणांवरही या घडामोडींचा परिणाम होण्याची शक्यता राजकीय वर्तुळात वर्तवली जात आहे.
स्थानिकांमध्ये त्यांच्या उमेदवारीबद्दल उत्सुकता वाढली असून, “या वेळी बदलाची हवा वेताळ नगरातूनच सुरू होईल,” अशा प्रतिक्रिया नागरिकांकडून उमटताना दिसत आहेत.
तुळजापूर नगरपरिषदेच्या या निवडणुकीत प्रभाग क्र. ८ मधील रंगत आगामी दिवसांत आणखी चढणार, यात शंका नाही.
