कनिष्ठ संरक्षण अधिकाऱ्यांचा कारभार संशयाच्या भोवऱ्यात; ‘घाडगे साहेबांचे घबाड’ उघड करण्याची मागणी!

कनिष्ठ संरक्षण अधिकाऱ्यांचा कारभार संशयाच्या भोवऱ्यात; ‘घाडगे साहेबांचे घबाड’ उघड करण्याची मागणी!

कार्यालयीन उपस्थिती, हालचाल नोंदवही, बायोमेट्रिकसह मुख्यालयी न राहण्याच्या आरोपांची चौकशी करा; मोबाईल स्थानाचीही तपासणी करण्याची मागणी

तुळजापूर | तुळजापूरनामा

तुळजापूर येथील कनिष्ठ संरक्षण अधिकारी कार्यालयाच्या कारभारावर गंभीर प्रश्नचिन्ह उपस्थित करण्यात आले आहे. कनिष्ठ संरक्षण अधिकारी घाडगे यांच्या कार्यालयीन उपस्थितीपासून ते ग्रामीण भागातील महिलांशी संबंधित कामकाजापर्यंत कथित अनियमिततेचे आरोप करण्यात आले असून, या संपूर्ण प्रकरणाची वरिष्ठ पातळीवर स्वतंत्र चौकशी करण्याची मागणी करण्यात आली आहे. ‘घाडगे साहेबांचे घबाड उघड करा!’ अशी आक्रमक मागणीही करण्यात आली आहे.

घाडगे हे तुळजापूर येथे कार्यरत झाल्यापासून कार्यालयीन वेळेत नियमित उपस्थित राहत नसल्याचा आरोप करण्यात आला आहे. ते सोलापूरहून तुळजापूरला ये-जा करतात आणि अनेकदा साडेबारा ते एकच्या सुमारास कार्यालयात दाखल होत असल्याचा दावा करण्यात आला आहे. मात्र, या आरोपांची अधिकृत पडताळणी झालेली नसल्याने प्रशासनाने वस्तुस्थिती तपासणे आवश्यक आहे.

‘मोबाईल स्थानाची तपासणी करा!’

घाडगे यांच्या कार्यालयीन उपस्थितीबाबत वस्तुस्थिती समोर आणण्यासाठी त्यांच्या अधिकृत शासकीय मोबाईल क्रमांकाच्या उपलब्ध नोंदींची, तसेच नियमानुसार आवश्यक असल्यास दूरध्वनी नोंदींची तपासणी करावी, अशी मागणी करण्यात आली आहे. दूरध्वनी स्थान नोंदी व इतर अधिकृत उपस्थिती नोंदींची कायदेशीर चौकटीत पडताळणी केल्यास कार्यालयीन उपस्थितीचे वास्तव स्पष्ट होईल, असा दावा करण्यात आला आहे.

◾हालचाल नोंदवही कुठे?

अधिकारी-कर्मचाऱ्यांच्या येण्या-जाण्याची नोंद ठेवणारी हालचाल नोंदवही उपलब्ध नसल्याचा आरोप करण्यात आला आहे. कनिष्ठ संरक्षण अधिकाऱ्यांच्या कक्षाला अनेकदा कुलूप असते आणि कक्ष उघडा असतानाही संबंधित अधिकारी उपस्थित नसल्याचे सांगण्यात आले आहे.

कार्यालयात बहुतांश वेळा केवळ एक महिला कर्मचारी व संगणक चालक उपस्थित असल्याचा दावाही करण्यात आला आहे. त्यामुळे कार्यालयीन कामकाज प्रत्यक्षात कसे चालते, असा सवाल उपस्थित करण्यात आला आहे.

◾बायोमेट्रिक आणि सीसीटीव्हीचा हिशेब द्या!

अधिकारी-कर्मचाऱ्यांच्या उपस्थितीची अचूक नोंद राहण्यासाठी असलेल्या बायोमेट्रिक व्यवस्थेची उपलब्धता आणि नोंदी, तसेच कार्यालयातील सीसीटीव्ही व्यवस्थेची तपासणी करण्याची मागणी करण्यात आली आहे.

वरिष्ठ अधिकाऱ्यांनी अचानक कार्यालयाची पाहणी करून प्रत्यक्ष उपस्थिती, हालचाल नोंदवही, बायोमेट्रिक नोंदी आणि सीसीटीव्ही यांची तपासणी करावी, अशी मागणी करण्यात आली आहे.

◾ग्रामीण महिलांच्या प्रश्नांकडे दुर्लक्षाचा आरोप

तुळजापूर तालुक्यातील ग्रामीण भागातील महिलांशी संबंधित कामकाजातही शासकीय निकषांचे पालन होत नसल्याचा आरोप करण्यात आला आहे. संबंधित योजनांची अंमलबजावणी, लाभार्थी महिलांना मिळणाऱ्या सुविधा आणि कार्यालयीन पातळीवरील कार्यवाही यांची प्रत्यक्ष तपासणी करण्याची मागणी करण्यात आली आहे.

◾‘मनमानी कारभारावर पांघरूण का?’

शासकीय कार्यालयीन वेळेचे पालन करण्याबाबतही प्रश्न उपस्थित करण्यात आला आहे. सकाळी ९.४५ वाजता कार्यालयीन कामकाज सुरू होण्याच्या नियमाचे पालन होत आहे का? याची वरिष्ठ अधिकाऱ्यांनी तपासणी करावी, अशी मागणी करण्यात आली आहे.

दरम्यान, ‘कनिष्ठ संरक्षण अधिकाऱ्यांचा मनमानी कारभार; घाडगे यांचे कथित घबाड उघड होणार का?’ असा सवाल उपस्थित करण्यात आला आहे.

घाडगे यांच्यावरील सर्व आरोप हे तक्रारदारांच्या दाव्यांवर आधारित असून, त्यांची स्वतंत्र अधिकृत पडताळणी झालेली नाही. त्यामुळे जिल्हा प्रशासनाने निष्पक्ष चौकशी करून कार्यालयीन उपस्थिती, मुख्यालयातील वास्तव्य, अधिकृत नोंदी, बायोमेट्रिक व्यवस्था, सीसीटीव्ही आणि संबंधित कामकाजाची तपासणी करावी. चौकशीत दोष आढळल्यास नियमानुसार कारवाई करावी, अशी मागणी करण्यात आली आहे.

0 8 5 6 2 6