भाविकांना पायपीट, एसटी प्रशासनाची मनमानी! छत्रपती संभाजी महाराज बसस्थानक तातडीने सुरू करा; डेपो व्यवस्थापकांच्या कारभाराची चौकशी करा, बबनराव गावडे यांची मागणी

भाविकांना पायपीट, एसटी प्रशासनाची मनमानी!

छत्रपती संभाजी महाराज बसस्थानक तातडीने सुरू करा; डेपो व्यवस्थापकांच्या कारभाराची चौकशी करा, बबनराव गावडे यांची मागणी

तुळजापूर : तुळजापूर नामा

महाराष्ट्राची कुलस्वामिनी आई तुळजाभवानीच्या दर्शनासाठी राज्याच्या कानाकोपऱ्यातून येणाऱ्या भाविकांची गैरसोय थांबणार तरी कधी? तुळजापूर येथील छत्रपती संभाजी महाराज बसस्थानक अर्थात जुने बसस्थानक बंद ठेवल्यामुळे सोलापूरसह इतर भागांकडे जाणाऱ्या भाविकांना नाहक पायपीट करावी लागत असल्याचा आरोप राष्ट्रवादी काँग्रेस (अजित पवार गट) सोशल मीडिया विभागाचे तुळजापूर येथील बबनराव गावडे यांनी केला आहे. नवरात्रोत्सव, दसरा आणि अश्विनी पौर्णिमा यात्रेच्या पार्श्वभूमीवर जुने बसस्थानक तातडीने खुले करावे आणि तुळजापूर एसटी डेपो व्यवस्थापकांच्या कारभाराची सखोल चौकशी करावी, अशी मागणी त्यांनी केली आहे.

तुळजापूरच्या लातूर रोडवरील मध्यवर्ती बसस्थानकातून एसटी सेवा उपलब्ध असली, तरी दर्शनासाठी येणाऱ्या भाविकांसाठी हे ठिकाण गैरसोयीचे ठरत असल्याचे गावडे यांचे म्हणणे आहे. अनेक भाविक वृद्ध, ज्येष्ठ नागरिक, महिला आणि लहान मुलांसह तुळजापूरला येतात. काही भाविक दूरवरून अनवाणी चालत दर्शनासाठी येतात. दर्शनानंतर सोलापूर किंवा अन्य ठिकाणी जाण्यासाठी त्यांना पुन्हा लातूर रोडवरील बसस्थानकापर्यंत पायपीट करावी लागत असल्याने त्यांचे हाल होत असल्याचा मुद्दा त्यांनी उपस्थित केला.

◾बंद बसस्थानकाचा आदेश कुणाचा?

जुने बसस्थानक बंद ठेवण्याबाबत तेथील कर्मचाऱ्यांकडे विचारणा केली असता, डेपो व्यवस्थापकांच्या सांगण्यावरून बसस्थानक बंद असल्याचे सांगण्यात आल्याचा दावा गावडे यांनी केला. त्यानंतर डेपो व्यवस्थापकांची भेट घेऊन त्यांनी याबाबत जाब विचारला. मात्र, बसस्थानक बंद करण्यामागे जिल्हाधिकारी आणि पोलीस प्रशासनाचे आदेश असल्याचे सांगण्यात आले; परंतु संबंधित आदेशपत्र दाखविण्यात आले नसल्याचा आरोपही त्यांनी केला आहे.

बसस्थानक बंद करण्याचा निर्णय नेमका कुणाचा, त्यामागील अधिकृत कारण काय आणि त्यासंबंधी लेखी आदेश आहे का, याची वरिष्ठ अधिकाऱ्यांनी स्पष्टता द्यावी, अशी मागणी गावडे यांनी केली आहे.

◾‘कॅमेरा बंद करा, नाहीतर एसटी सेवा बंद करू’; दबावाचा आरोप

बसस्थानकाबाबत विचारणा करताना काही कर्मचाऱ्यांनी माध्यमांचा कॅमेरा बंद करण्यासाठी दबाव आणला आणि अन्यथा एसटी सेवा बंद करण्याची धमकी दिल्याचा आरोप गावडे यांनी केला आहे. संबंधित कर्मचारी गणवेशात नव्हते, असाही त्यांचा दावा आहे. या आरोपांची निष्पक्ष चौकशी करून दोषी आढळणाऱ्या अधिकारी-कर्मचाऱ्यांवर एसटी महामंडळाच्या नियमानुसार कारवाई करावी, अशी मागणी त्यांनी केली.

◾नवरात्रोत्सवात भाविकांची गैरसोय नको!

आई तुळजाभवानीच्या नवरात्रोत्सवात तसेच दसरा आणि अश्विनी पौर्णिमेच्या यात्रेत तुळजापुरात भाविकांची मोठी गर्दी होते. अशा काळात वाहतुकीचे नियोजन करताना भाविकांच्या सोयीला प्राधान्य देणे आवश्यक आहे. त्यामुळे सोलापूरकडे जाणाऱ्या आणि इतर मार्गांवरील प्रवाशांसाठी छत्रपती संभाजी महाराज जुने बसस्थानक सुरू करावे. तसेच डेपो व्यवस्थापक आणि संबंधित कर्मचाऱ्यांच्या वर्तणुकीची, गणवेशाच्या नियमपालनाची आणि बसस्थानक बंद ठेवण्याच्या निर्णयाची चौकशी करावी, अशी मागणी गावडे यांनी केली आहे.

“भाविकांची गैरसोय करून कोणाचेही हित साधले जाणार नाही. बसस्थानक बंद ठेवण्यामागील अधिकृत कारण जनतेसमोर स्पष्ट करा आणि भाविकांना दिलासा देण्यासाठी जुने बसस्थानक सुरू करा,” अशी भूमिका बबनराव गावडे यांनी मांडली आहे.

◾वरील वृत्त बबनराव गावडे यांनी केलेल्या आरोपांवर व मागण्यांवर आधारित आहे. बसस्थानक बंद ठेवण्याबाबत एसटी महामंडळ, डेपो व्यवस्थापक, जिल्हा प्रशासन किंवा पोलीस प्रशासनाची अधिकृत बाजू उपलब्ध झालेली नाही.

0 8 5 6 3 1