दुष्काळात चाऱ्याची जिल्ह्याबाहेर वाहतूक करणाऱ्यांना प्रशासनाचा दणका!

दुष्काळात चाऱ्याची जिल्ह्याबाहेर वाहतूक करणाऱ्यांना प्रशासनाचा दणका!

तामलवाडी टोलनाक्यावर महसूल-पोलिसांची संयुक्त कारवाई; जिल्हाबंदी झुगारणाऱ्या वाहनचालकांकडून लेखी हमी घेत गाड्या सोडल्या!

तुळजापूरनामा : तुळजापूर

धाराशिव जिल्ह्यात दुष्काळाचे संकट गडद होत असताना चारा जिल्ह्याबाहेर नेण्यास प्रतिबंध करणाऱ्या जिल्हाधिकाऱ्यांच्या आदेशाचे उल्लंघन करणाऱ्या वाहनांवर महसूल आणि पोलीस प्रशासनाने संयुक्त कारवाई केली.तुळजापूर तालुक्यातील तामलवाडी टोलनाक्यावरील तपासणीदरम्यान रात्रीच्या सुमारास जिल्ह्याबाहेर चारा घेऊन जाणारी वाहने आढळून आल्याने पथकाने ती ताब्यात घेतली.

तहसील कार्यालयाच्या आदेशानुसार तामलवाडी टोलनाक्यावर तपासणी नाका स्थापन करण्यात आला आहे. या ठिकाणी सुरू असलेल्या तपासणीदरम्यान जिल्हाबंदी आदेशाचे उल्लंघन करून चारा वाहतूक होत असल्याचे निदर्शनास आले. त्यानंतर संबंधित वाहनचालक आणि मालकांकडून यापुढे जिल्हाबंदी आदेशाचे उल्लंघन करणार नसल्याची लेखी हमी घेण्यात आली. त्यानंतर संबंधित वाहने सोडून देण्यात आली.

या संयुक्त कारवाईत तामलवाडी महसूल विभागाचे मंडळ अधिकारी श्रीनिवास पवार,तामलवाडी पोलीस ठाण्याचे सहाय्यक पोलीस निरीक्षक विजय आटोळे यांच्या मार्गदर्शनाखाली बीट अंमलदार संजय कलमदाने यांचे सहकारी, तसेच सचिन शिंदे आणि ओंकार जगताप उपस्थित होते.

दरम्यान, दुष्काळाच्या पार्श्वभूमीवर जिल्ह्यातील पशुधनासाठी चारा उपलब्ध राहावा, यासाठी प्रशासनाकडून खबरदारी घेतली जात आहे. तामलवाडी टोलनाक्यावर चोवीस तास तपासणी सुरू असून, विनापरवाना चारा वाहतूक करताना आढळल्यास कडक कारवाई केली जाईल, असा इशारा प्रशासनाने दिला आहे.

0 8 5 6 3 0